முன்னாள் ஜனாதிபதி மஹிந்த ராஜபக் ஷ தற்போது தஞ்சம் புகுந்துள்ள ஸ்ரீலங்கா பொதுஜன முன்னணிக்கும் ஸ்ரீலங்கா சுதந்திர கட்சிக்கும் இடையில் எந்த உறவும் இல்லை. கட்சியை விட்டு வெளியேறி கட்சியை விமர்சிக்கும் நபர்களுக்கு எதிராக சட்ட நடவடிக்கை எடுக்கப்படும் என்று ஸ்ரீலங்கா சுதந்திர கட்சி தெரிவித்துள்ளது.
முன்னாள் ஜனாதிபதி மஹிந்த ராஜபக் ஷ எம்முடன் இணைய வேண்டுமே தவிர நாம் அவர்களுடன் கைகோர்க்க எந்த தேவையும் இல்லை. மஹிந்த ராஜபக் ஷ இல்லாமலும் தேர்தல்களை வெற்றிகொள்வோம் எனவும் அக்கட்சி குறிப்பிட்டது.
ஸ்ரீலங்கா சுதந்திர கட்சியின் வாராந்த செய்தியாளர் சந்திப்பு நேற்று கட்சி தலைமை அலுவலகத்தில் இடம்பெற்றது. இதில் கலந்துகொண்டு கருத்து தெரிவிக்கும்போதே அமைச்சர் மஹிந்த சமரசிங்க இதனைக் குறிப்பிட்டார்.
அவர் மேலும் குறிப்பிடுகையில்
உள்ளூராட்சி சபைத்தேர்தலில் ஸ்ரீலங்கா சுதந்திர கட்சியுடன் இணைந்து செயற்பட பல சிறிய மற்றும் சிறுபான்மை கட்சிகள் இணக்கம் தெரிவித்துள்ளன. மேலும் கட்சிகளை இணைத்துக்கொண்டு செயற்பட பேச்சுவார்த்தைகள் முன்னெடுக்கப்பட்டும் வருகின்றன.
எனினும் ஸ்ரீலங்கா சுதந்திர கட்சி எப்போதும் உறுதியான கட்சியான மக்களின் கட்சியாக இருந்தே செயற்பட்டு வருகின்றது. வேறு யாரையும் நம்பியோ அல்லது இன்னொரு கட்சியின் தயவில் இருந்தோ எம்மை தக்கவைத்துக்கொள்ள வேண்டும் என்ற நிலைமை வரவில்லை. ஜனாதிபதி மைத்திரிபால சிறிசேன தலைமையில் உறுதியான கட்சியாக நாம் செயற்பட்டு வருகின்றோம். அதேபோல் ஸ்ரீலங்கா சுதந்திர கட்சி எந்த சின்னத்தில் போட்டியிடும் என்பது இன்னமும் தீர்மானிக்கப்படவில்லை. பேச்சுவார்த்தைகள் முன்னெடுக்கப்பட்டு வருகின்றன, கை சின்னமா அல்லது வெற்றிலை சின்னமா என்பதை விரைவில் அறிவிப்போம். மேலும் பொதுஜன முன்னணி என்பது ஸ்ரீலங்கா சுதந்திர கட்சி அல்ல. பொதுஜன முன்னணிக்கும் ஸ்ரீலங்கா சுதந்திர கட்சிக்கும் இடையில் எந்த தொடர்பும் இல்லை. அவர்களுடன் எந்தவித உறவும் எமக்கு இல்லை. அவ்வாறு இருக்கையில் ஸ்ரீலங்கா சுதந்திர கட்சியில் இருந்து வாக்குகளை பெற்றுக்கொண்ட, வசப்பிரசாதங்களை பெற்றுக்கொண்ட நபர்கள் தேர்தலில் பொதுஜன முன்னணியுடன் இணைந்துகொண்டு கட்சியை விமர்சிப்பார்களாயின் அவர்களுக்கு எதிராக ஒழுக்காற்று நடவடிக்கை மற்றும் சட்ட நடவடிக்கை எடுக்கவே ஸ்ரீலங்கா சுதந்திர கட்சி தீர்மானம் எடுத்துள்ளது. ஸ்ரீலங்கா சுதந்திர கட்சியை வீழ்த்த வேண்டும் என்ற நிலைப்பாட்டில் இருந்துகொண்டு ஜனாதிபதி மைத்திரிபால சிறிசேனவை பழிவாங்க நிலைக்கும் நகர்வுகளை வேடிக்கை பார்க்கப்போவதில்லை. ஆகவே ஸ்ரீலங்கா சுதந்திர கட்சியின் பாராளுமன்ற உறுப்பினர்கள் மட்டுமல்ல மாகாணசபை, பிரதேசசபை உறுப்பினர்களுக்கும் இது பொருந்தும்.
உண்மையான ஸ்ரீலங்கா சுதந்திர கட்சிக்காரார்கள் நாங்கள் தான் என மேடைகளில் ஏறி சவால் விடும் நபர்கள் ஒன்றை விளங்கிக்கொள்ள வேண்டும். நீங்கள் உண்மையான ஸ்ரீலங்கா கட்சிக் காரர்கள் என்றால் விகாரைகளில், பொது மேடைகளில் இருந்து கருத்துக்களை முன்வைக்காது ஸ்ரீலங்கா சுதந்திர கட்சியின் தலைமை அலுவலகத்திற்கு வந்து எம்முடன் பேச்சுவார்த்தை நடத்த வேண்டும்.
முன்னாள் ஜனாதிபதி மஹிந்த ராஜபக் ஷ உண்மையான ஸ்ரீலங்கா சுதந்திர கட்சிக்காரர் என்றால் அவர் இங்கு வரவேண்டும். மாறாக அவரைத்தேடி நாம் செல்லவேண்டும் என்ற தேவை ஏற்படவில்லை. அவரை நம்பி நாம் களத்தில் இறங்கவில்லை. அவர் இருந்தாலும், இல்லாவிட்டலும் நாம் தேர்தலில் வெற்றியை பெற்றுக்காட்டுவோம். மஹிந்த ராஜபக் ஷ இல்லாவிட்டலும் ஜனாதிபதி மைத்திரிபால சிறிசேனவினால் தேர்தலை வெற்றிகொள்ள முடியும். கடந்த இரண்டு தேர்தல்களின் முடிவுகளும் அனைவருக்கும் நினைவில் இருக்கும் என நம்புகின்றேன். எனினும் ஸ்ரீலங்கா சுதந்திரக் கட்சியாக நாம் அனைவரும் இணைந்து செயற்பட வேண்டும். 95 உறுப்பினர்களும் இணைந்து செயற்பட்டால் எம்மால் பலமான ஆட்சியை உருவாக்க முடியும்.
எனினும் தேசிய அரசாங்கத்தை விட்டு ஸ்ரீலங்கா சுதந்திர கட்சி வெளியேறப்போவதில்லை. அதற்கான கட்டளை எமக்கு இன்னும் வரவில்லை. உள்ளூராட்சி சபைத் தேர்தல் என்பது வேறு தேசிய அரசாங்கத்தில் நாம் அங்கம் வகிப்பது வேறாகும். தேசிய அரசாங்கத்தை பலமாக முன்னெடுத்து சென்று பிரச்சினைகளை வெற்றிகொள்ள வேண்டிய பொறுப்பு எம் அனைவருக்கும் உள்ளது.
ஜனாதிபதியும் பிரதமரும் ஒரு இலக்கினை நோக்கி பயணித்து வருகின்றனர். அவ்வாறு இருக்கையில் நாமும் அரசாங்கத்தை பலப்படுத்த வேண்டிய கட்டாயம் உள்ளது. நாட்டின் ஊழல், குறித்து நடவடிக்கை எடுப்பதில் ஜனாதிபதி உறுதியாக உள்ளார். மத்திய வங்கி விடயத்தில் அவர் நடந்துகொண்ட விதம் அனைத்து தலைவர்களுக்கும் நல்லதொரு முன்னுதாரணமாகும். அதேபோல் பிரதமர் தாமாக முன்வந்து விசாரணைகளுக்கு பூரண ஒத்துழைப்பு வழங்கியமை சிறந்த எடுத்துக்காட்டாகும். ஆகவே இந்த ஆட்சியில் சட்டம் நீதிக்கு கீழ்ப்பட்டே அனைத்து செயற்பாடுகளும் உள்ளன என்பதை அரசாங்கம் நிருபித்து வருகின்றது. இம்மாதம் 8 ஆம் திகதி மத்திய வங்கி பிணைமுறி விடயம் குறித்த அறிக்கை ஜனாதிபதியிடம் கையளிக்கப்படும். அதன் பின்னர் நியாயமான தீர்வு ஒன்று கிடைக்கும் என்பது உறுதி எனவும் அவர் குறிப்பிட்டார்.