10 இலட்சத்து 700 மின்சாரக் கட்டமைப்புக்கள் பாதிப்பு என்கிறார் அமைச்சர்
தொடர் மழை காரணமாக துண்டிக்கப்பட்டிருக்கும் மின் விநியோகத்தை மீண்டும் சாதாரண நிலைக்கு கொண்டுவரும் விடயத்தில் காலதாமதம் ஏற்பட்டுள்ளது. எனினும் இதுவரைக்கும் பாதிக்கப்பட்டதில் அரைவாசிக்கும் அதிகமாக சீர்செய்யப்பட்டிருக்கின்றது என மின்வலு மற்றும் மீள் புத்தாக்க சக்தி அமைச்சர் ரஞ்ஜித் சியம்பலாப்பிட்டிய தெரிவித்தார்.
நாட்டில் ஏற்பட்டிருக்கும் அனர்த்த நிலையில் மின் விநியோகம் தொடர்பில் மின்வலு மற்றும் மீள் புத்தாக்க சக்தி அமைச்சில் நேற்று இடம்பெற்ற செய்தியாளர் சந்திப்பில் கலந்துகொண்டு கருத்து தெரிவிக்கையிலேயே அவர் இவ்வாறு தெரிவித்தார்.
அவர் அங்கு தொடர்ந்தும் கூறுகையில், நாட்டில் ஏற்பட்ட சீரற்ற காலநிலையுடன் கடந்த 29ஆம் திகதி இரவு 9மணியளவில் ஏற்பட்ட கடும் காற்று காரணமாக 10இலட்சத்து 700 மின்சார கட்டமைப்புகள் பாதிக்கப்பட்டன. இதனால் நாட்டில் மொத்த மின் நுகர்வோரில் 15வீதமானவர்களுக்கு மின் விநியோகம் தடைப்பட்டது. குறிப்பாக காலி, கொழும்பு, களுத்துறை மற்றும் தெற்கு பிரதேசங்களே அதிகளவில் பாதிக்கப்பட்டுள்ளன.
அத்துடன் கடந்த 29ஆம் திகதி இரவு 8.45 மணியளவில் மொத்த மின் தேவையாக 1526 மெகாவோட் இருந்தது. என்றாலும் அன்றையதினம் 10 மணியளவில் திடீரென மின் தேவை 727 மெகாவோட் வரை குறைந்தது. ஒரேதடவையில் மின்சார கட்டமைப்பில் இவ்வாறான மாற்றம் ஏற்படும்போது கட்டமைப்புக்குள் பாரிய சிக்கல் ஏற்படுக்கின்றது. இவ்வாறு மின் தேவை குறைவடைந்தது மக்களுக்கு அவசியம் இல்லை என்பதனால் அல்ல. மாறாக ஏற்பட்ட கடும் காற்று காரணமாக மின் கம்பங்கள் முறிந்து மின்துண்டிக்கப்பட்டமையே காரணமாகும்.
நாட்டில் இதற்கு முன்னரும் இவ்வாறானதொரு நிலை ஏற்பட்டபோது ஒட்டுமொத்த மின் கட்டமைப்பும் செயலிழந்தது. ஆனால் எமது அதிகாரிகள் அன்று பெற்றுக்கொண்ட அனுபவத்தின் மூலம் நாட்டுக்கு பாரிய பாதிப்பு ஏற்படாமல் நிலைமையை சீர்செய்துள்ளனர். ஆனால் வரலாற்றில் ஆகக்குறைந்த மின்தேவை ஏற்பட்டது கடந்த 29ஆம் திகதி இரவாகும். அதாவது முழு நாட்டுக்குமான மின்தேவை 727 மெகாவோட் வரை கீழ் இறங்கியது.
எனவே மின்சார கட்டமைப்பை சாதாரண நிலைக்கு கொண்டுவர அதிகாரிகள் அர்ப்பணிப்புன் நடவடிக்கைகளை மேற்கொண்டு வருகின்றபோதும் தொடர்ந்து பெய்துவரும் மழை காரணமாக அந்த பணிகளில் தாமதம் ஏற்படுள்ளன. இருந்தபோதும் இன்று (நேற்று) வரைக்கும் பாதிக்கப்பட்ட மின் கட்டமைப்பில் அரைவாசிக்கும் அதிகம் சீர்செய்யப்பட்டிருக்கின்றது. இன்னும் சுமார் 5இலட்சம் மின் கட்டமைப்புகள் சீர் செய்யப்பட வேண்டியுள்ளது. அதனையும் மிகவிரைவில் சீர்செய்வதற்கு நடவடிக்கை எடுத்துவருகின்றோம். அதற்கு தேவையான அனர்த்த பாதுகாப்பு அதிகாரிகள் அதிகமானோர் பாதிக்கப்பட்ட பிரதேசங்களுக்கு அனுப்பிவைக்கப்பட்டுள்ளனர் என்றார்.