வங்காள விரிகுடாவின் தாழமுக்க சுழல் காற்று இலங்கையை கடந்து அரபுக்கடலை நோக்கி நகர்ந்துள்ள போதிலும் தற்போது தாழமுக்கம் சூறாவளியாக மாறியுள்ளது. இலங்கைக்கு நேரடியான தாக்கங்கள் இல்லையென கூறப்படுகின்ற போதிலும் சீரற்ற காலநிலை தொடரும் எனவும் காலநிலை அவதான நிலையம் தெரிவித்துள்ளது.
சீரற்ற காலநிலையின் காரணமாக இதுவரையில் 11 பேர் உயிரிழந்துள்ளதுடன், ஐவர் காணாமல் போயுள்ளனர். 11 மாவட்டங்களில் மொத்தமாக 61 ஆயிரத்துக்கும் அதிகமான பொதுமக்கள் பாதிக்கப்பட்டுள்ளனர். வங்காள விரிகுடா பகுதியில் ஏற்பட்டிருந்த தாழமுக்கம் இலங்கைக்கு அருகில் சுழல் காற்றுடன் கூடிய காலநிலையினை உருவாக்கியிருந்த நிலையில், தற்போது அரபுக் கடல் பகுதியை நோக்கி நகர்ந்துள்ளது. இலங்கையில் இருந்து 500- தொடக்கம் 600 கிலோமீற்றர்
தூரத்தில் தற்போது சூறாவளியாக அது மாறியுள்ளது. ஒக்கி (OCKHI) என பங்களாதேஷ் காலநிலை அவதான நிலையத்தினால் பெயர் சூட்டப்பட்ட இந்த சூறாவளியானது இலங்கைக்கு நேரடியான தாக்கத்தை ஏற்படுத்த வாய்ப்புகள் மிகவும் குறைவாக இருந்த போதிலும் நிலவும் சீரற்ற காலநிலை இன்னும் சில தினங்களுக்கு தாக்கத்தை செலுத்தும் என காலநிலை அவதான நிலையம் தெரிவித்துள்ளது.
தற்போது வரையில் மணித்தியாலத்திற்கு 25 கிலோமீற்றர் வேகத்தில் இந்த சூறாவளி மேற்கு-வடமேற்குத் திசையில் இலங்கையைவிட்டு அப்பால் நகர்வதன் காரணத்தினால் இலங்கைக்கு பாதிப்பு ஏற்படாது எனவும் கூறப்படுள்ளது. எனினும் சூறாவளி எந்தப்பக்கம் நகரும் என்பது எதிர்வுகூட முடியாத நிலையில் தொடர்ந்தும் அவதானமாகவும் முன்னாயத்த அனர்த்த நடவடிக்கைகளை தயார் நிலையில் வைத்திருக்குமாறும் அனர்த்த முகாமைத்துவ மத்திய நிலையம் வலியுறுத்தி யுள்ளது.
இந்நிலையில் அரபிக் கடலில் உருவாகியுள்ள இந்த சூறாவளியானது எதிர்வரும் 5ஆம் திகதிவரை அப் பகுதியில் தாக்கம் செலுத்தும் என எதிர்வுகூறப்படுகின்றது.
55,000 பேர் பாதிப்பு
இலங்கையில் தொடர்ச்சியாக நிலவிவரும் சீரற்ற காலநிலை காரணமாக இதுவரை 11 மாவட்டங்களை சேர்ந்த 84 பிரதேச செயலாளர் பிரிவுகள் பாதிக்கப்பட்டுள்ளன. இவற்றில் இதுவரையில் 14 ஆயிரத்து 617 குடும்பங்களை சேர்ந்த 55 ஆயிரத்து 855 நபர்கள் பாதிக்கப்பட்டுள்ளனர். அத்துடன் 11 ஆயிரத்து 397 வீடுகள் பகுதியளவில் சேதமடைந்துள்ளதுடன் 430 வீடுகள் முழுமையாக சேதமைந்துள்ளதாக அனர்த்த முகாமைத்துவ மத்திய நிலையம் தெரிவித்துள்ளது.
அத்துடன் தொடர்ச்சியாகபெய்துவரும் மழையினால் மலையகத்தில் பல்வேறு இடங்களிலும் வீடுகள்,விவசாயக்காணிகள் பாதிக்கப்பட்டுள்ள நிலையில் மக்களின் அன்றாட வாழ்க்கை சீர்குலைந்துள்ளது.
இதுவரையில் அனர்த்தத்தில் சிக்குண்டு 8 பேர் உயிரிழந்துள்ளதுடன் 8 பேர் காணமால்போயுள்ளனர். 30 பேர் பாரிய காயங்கள் காரணமாக வைத்தியசாலைகளில் அனுமதிக்கப்பட்டுள்ளனர். மேலும் 11 மாவட்டங்களில் ஏற்பட்டுள்ள அனர்த்தங்களின் சிக்குண்ட மக்கள் முகாம்களில் தங்கவைக்கப்பட்டுள்ளனர். இதுவரையில் 901 குடும்பங்களை சேர்ந்த 3279 நபர்கள் மொத்தமான 28 முகாம்களில் தற்போது வரையில் தங்கவைக்கப்பட்டுள்ளனர்.
களுத்துறையில் அதிக பாதிப்பு
களுத்துறை மாவட்டமே அதிகளவில் பாதிக்கப்பட்டுள்ள நிலையில் 8 ஆயிரத்து 18 குடும்பங்களை சேர்ந்த 31 ஆயிரத்து 314 பேர் பாதிக்கப்பட்டுள்ளனர். 285 வீடுகள் முழுமையாகவும் 6596 வீடுகள் பகுதி அளவிலும் பாதிக்கப்பட்டுள்ளன.
கம்பஹா மாவட்டத்தில் 8ஆயிரத்து 765 குடும்பங்களை சேர்ந்த 34ஆயிரத்து 336 நபர்கள் பாதிக்கப்பட்டுள்ளனர். காலி மாவட்டத்தில் 3145 குடும்பங்களை சேர்ந்த 11ஆயிரத்து 320 நபர்கள் பாதிக்கப்பட்டுள்ளனர். மூன்று மரணங்களும் பதிவாகியுள்ளது. மாத்தளை மாவட்டத்தில் 3884 குடும்பங்களை சேர்ந்த 14 ஆயிரத்து 49 பேரும் , பதுளை மாவட்டத்தில் 1316 குடும்பங்களை சேர்ந்த 4821 பேரும் பாதிக்கப்பட்டுள்ளனர். மூன்று மரணங்களும் பதிவாகியுள்ளது.
நீர்த்தேக்கங்கள், ஆறுகளின் நீர் மட்டம் உயர்வு
மழையுடனான காலநிலை தொடர்வதால் நில்வள, ஜின் மற்றும் களு கங்கைகளின் நீர் மட்டம் அதிகரித்துள்ளது.நேற்று காலை பெய்த கனமழையை அடுத்து மீண்டும் தாழ்நில பகுதிகள் பாதிக்கப்பட்டுள்ளன. களுத்துறை , வலல்லாவிட்ட மற்றும் புளத்சிங்கள பகுதிகளில் தாழ் நிலப்பிரதேசங்கள் நீரில் மூழ்கியுள்ளன . நில்வள கங்கை பெருக்கெடுத்துள்ளதன் காரணத்தினால் அகுரெஸ்ஸ – உடுகம , அகுரெஸ்ஸ -பங்கம மற்றும் அகுரெஸ்ஸ கத்தூவ போன்ற வீதிகள் முழுமையாக நீரில் மூழ்கியுள்ளன. மலையகத்தின் நீர்த்தேக்கங்கள் மற்றும் பிரதான நீர்த்தேக்கங்கள் அனைத்திலும் நீர் மட்டம் உயர்வடைந்துள்ளது. மேல் கொத்மலை, லக்ஸபான, மகாவலி நீர்த்தேக்கங்களின் வான்கதவுகள் சிலவும் திறந்துவிடப்பட்டுள்ளன. அத்துடன் மகாவலி கங்கை, களனி கங்கை, களுகங்கை ஆகிய ஆறுகளும் பெருக்கெடுத்துள்ள நிலையில் தாழ்நில பகுதிகளில், ஆறுகளின் அருகிலுள்ள பொதுமக்கள் அவதானமாக இருக்குமாறு அனர்த்த முகாமைத்துவ மையம் அறிவித்துள்ளது.
காலியில் சிறிய அளவிலான சூறாவளிக் காற்று.
இதேவேளை காலி பிரதேசத்தில் நேற்று முன்தினம் பிற்பகல் சிறிய அளவிலான சூறாவளி காற்றும் வீசியுள்ளது.
‘டொர்னடோ’ என்று அழைக்கப்படும் சூறாவளி குறித்த காணொளியொன்றை குறித்த பிரதேச மக்கள் சமூக வலைத்தளங்களில் பதிவேற்றியுள்ளதை அடுத்து அதுகுறித்து காலநிலை அவதான நிலையம் கவனம் செலுத்தியுள்ளது. பாதிப்புகள் ஏற்படாத வகையில் சாதாரண அளவில் ஏற்பட்டுள்ள இந்த காற்று அழுத்தம் குறித்து அச்சம் கொள்ளத்தேவையில்லை எனவும் காலநிலை அவதான நிலையம் தெரிவித்துள்ளது.
முன்னெச்சரிக்கை நடவடிக்கைகள்
அனர்த்தமொன்று ஏற்படும் பட்சத்தில் உடனடியாக அனர்த்தம் குறித்து அறிவிக்க உள்நாட்டு அலுவல்கள் அமைச்சால் 1902 என்ற அவசர தொலைப்பேசி இலக்கம் வழங்கப்பட்டுள்ளது. குறித்த இலக்கத்துக்கு அழைப்பதன் மூலம் உள்நாட்டு அலுவல்கள் அமைச்சின் செயலாளருக்கு அனர்த்த நிலை தொடர்பில் தகவல்களை பெற்றுக்கொடுக்க முடியும் என அந்த அமைச்சு விடுத்துள்ள அறிக்கையில் குறிப்பிடப்பட்டுள்ளது.
நான்கு மாவட்டங்களுக்கு தொடர்ந்தும் மண்சரிவு எச்சரிக்கை.
இதேவேளை தொடர்ந்தும் மழைவீழ்ச்சி காணப்படுவதை அடுத்து இரத்தினபுரி, களுத்துறை, நுவரெலியா, பதுளை ஆகிய மாவட்டங்களுக்கு தொடர்ந்தும் மண்சரிவு அபாய எச்சரிக்கை விடுக்கப்பட்டுள்ளது. நேற்று சில பகுதிகளில் மண்சரிவுகள் ஏற்பட்டுள்ளதை அடுத்து பாரிய விளைவுகள் ஏற்பட முன்னர் மக்களை பாதுகாப்பான இடங்களுக்கு நகருமாறு அனர்த்த முகாமைத்துவ மத்திய நிலையம் வலியுறுத்தியுள்ளது.
நுவரெலியா மாட்டத்தின் 14 கிராமங்கள் மற்றும் தோட்டங்கள் மண்சரிவு மற்றும் மழைநீரினால் நிரம்பி சேதத்திற்கு உள்ளாகியுள்ளன. இதில் 421 குடும்பங்களைச் சேர்ந்த 1781 நபர்கள் பாதிக்கப்பட்டுள்ளனர். கந்தப்பளை,பொரலந்த,பட்டிபொலை,சாந்திபுர,பம்பரகலை,ரத்னகிரி,என்போல்ட்,சந்திரிகாமம்,டயகம,எல்பெத்த,பட்டிபொல,பாமஸ்டன் மற்றும் நுவரெலியாஆகிய பிரதேசங்களிலே இவ்வாறான அனர்த்தங்கள் ஏற்பட்டுள்ளதாக பிரதேசசெயலாளர் தெரிவித்தார்.
அதேவேளை இரத்தினபுரி, பதுளை ஆகிய மாவட்டங்களில் பல்வேறு இடங்களில் சிறிய அளவில் மண் மேடுகள், பாறைகள் வீழ்ந்துள்ள நிலையில் மக்களை அவதானமாக இருக்குமாறு அனர்த்த முகாமைத்துவ மத்திய நிலையம் தொடர்ச்சியாக வலியுறுத்தி வருகின்றது. மழைக் காலநிலை தொடர்ச்சியாக நிலவிவருவதை அடுத்து இரத்தினபுரி, களுத்துறை, பதுளை ஆகிய மாவட்டங்கள் அதிகமாக பாதிக்கப்படவும் வாய்ப்புகள் உள்ளதாக தெரிவிக்கப்படுகின்றது.
மழைக் காலநிலை தொடரும்.
சுழல் காற்று காலநிலை மாற்றம் கண்டுள்ள போதிலும் தொடர்ச்சியாக சில தினங்களுக்கு மழைக் காலநிலை தொடரும் என காலநிலை அவதான நிலையம் தெரிவித்துள்ளது. நேற்று அதிகலையில் இருந்து வடக்கு, மத்திய, வடமேல், மேல், கிழக்கு, ஊவா மாகாணங்களில் கனமழை பெய்துவருகின்றது. நுவரெலியாவின் சில பகுதிகளில் 135 மில்லிமீற்றருக்கும் அதிகமான மழைவீழ்ச்சி பதிவாகியுள்ளது. கொழும்பு, காலி, களுத்துறை இரத்தினபுரி ஆகிய மாவட்டங்களிலும் 60- – 70 மில்லிமீற்றர் மழைவீழ்ச்சி பதிவாகியுள்ளது. ஆகவே இன்னும் சில தினங்களுக்கு மழைக் காலநிலையும் மணிக்கு 50 கிலோமீற்றர் வேகத்திலான காற்றும் வீசும் என வளிமண்டலவியல் திணைக்களம் தெரிவித்துள்ளது. கரையோர பகுதிகளிலும் தொடர்ச்சியாக அனர்த்த எச்சரிக்கை விடுக்கப்பட்டுள்ளது.